|
Ceremonia zyrtare e zhvilluar sot në Presidencë, Presidenti i Republikës, Prof. Dr. Bamir Topi përshëndeti delegacionin shqiptar pjesëmarrës në Lojërat Olimpike Dimërore të Vankuverit 2010 duke i dorëzuar edhe flamurin kombëtar skiatorit Erjon Tola.
Në këtë ceremoni ishin të pranishëm Presidenti i KOKSH, z. Agim Fagu, Zv.ministri i Turizmit, Kulturës, Rinisë dhe Sporteve, z. Dashnor Bajaziti, Anëtarë të Komitetit Ekzekutiv të KOKSH dhe Përfaqësues të Federatës Shqiptare të Skive. Pas ekzekutimit të Himnit Kombëtar dhe atij Olimpik, Kreu i shtetit i dorëzoi skiatorit Erjon Tola flamurin kombëtar kuq e zi për ta valëvitur krenar mes qindra vendeve pjesëmarrëse në Lojrat Olimpike Dimërore 2010, që do të zhvillohen në Vankuver të Kanadasë nga 12-28 Shkurt 2010.
Fjalën e parë përshëndetëse e mori z. Fagu, i cili përgëzoi skiatorin Tola për realizimin e ëndrrës Olimpike dhe theksoi rëndsinë e historike të pjesëmarrjes së Shqipërisë por gjithashtu edhe si një model për inkurajimin e të rinjve të tjerë të merren me këtë sport.
Në vijim, në fjalën përshëndetëse z. Bajaziti në emër të MTKRS uroi skiatorin Tola dhe theksoi rolin e ministrisë për një vëmnëdje më të madhe ndaj sporteve dimërore dhe mbështetje të të gjitha sporteve në përgjithësi.
 Presidenti I Republikës z. Bamir Topi, iu drejtua të pranishmëve në këtë ceremoni dhe të gjithë pjesëmarrësve në Lojërat Olimpike Dimërore duke u shprehur: “I nderuar zoti Zëvendësministër Bajaziti,
I nderuar zoti Fagu,
Të nderuar përfaqësues jo vetëm të botës së sportit e të Olimpizmit!
Të nderuar përfaqësues të medias dhe do ta specifikoja të medias sportive, sepse fatmirësisht sot kemi një kualifikim dhe të dimensionit të medias!
Edhe për mua është një moment i veçantë, një nga ato emocione që të jep bota e sportit, por natyrisht të jep edhe simbolika e këtij aktiviteti, simbolika që lidhet me dorëzimit të flamurit kombëtar. Besoj që ky është një moment emocionues për të gjithë dhe mbi të gjithë moment emocionues për Erjonin, i cili ndonëse përfaqësues i vetëm në këto gara, do të jetë ai që do të ketë në dorë flamurin kombëtar me një mesazh shumë të fortë. Ne do të dëshironim që pjesëmarrja të ishte më e gjerë, por tek e fundit është shumë e rëndësishme të marrësh pjesë. Në një farë mënyre jeni pikë referimi për këtë lloj sporti, i cili paradoksalisht në një vend me një terren kryesisht malor nuk praktikohet edhe aq, jemi mësuar ta studiojmë që në vitet e para kur kemi mësuar gjeografinë fizike të vendit tonë, rreth tre të katërtat e territorit është kodrinor-malor dhe faktikisht sot kemi një sport, i cili përveç disa elementeve të zbehur të traditës, edhe atë sportist që kemi e ushtron këtë lloj aktiviteti jashtë këtij terreni.
Mesazhi im përtej simbolikës shumë të rëndësishmë. Është mesazh që e bëj me vëmendjen për t’iu kthyer traditës, për ta shfrytëzuar këtë mundësi të jashtëzakonshme që na ka dhënë Zoti dhe natyra dhe për ta ushtruar këtë sport, sepse është një sport, i cili frekuentohet sot nga miliona njerëz. Mjafton të shkosh në ato vende që e kanë traditë për të parë sesa masiv është ky sport. Unë ju falënderoj sinqerisht në emrin tim dhe në emër të të gjithë shqiptarëve që jeni pjesë e këtij kompeticioni të rëndësishëm në Lojrat e 21-ta Olimpike ku flamuri shqiptar do të ngrihet në Vankuver. Është shumë e rëndësishme që do të jeni pikë referimi për të edukuar brezat.
Përtej kësaj simbolike do të jap dhe mesazhet e mia për të gjitha institucionet, të cilat duhet të shohin olimpizmin si një element shumë të rëndësishëm për edukimin e brezit të ri. Ky është roli më i rëndësishëm me të gjithë elementet pedagogjikë dhe psikologjik të formimit të brezit të ri i jepet një rëndësi e jashtëzakonshme edukatës fizike dhe besoj që ky është mesazh që jepet sot drejtpërdrejtë edhe nëpërmjet këtij aktiviteti. Kur thashë që ne e kemi të domosdoshme që ta zhvillojmë këtë sport mjafton të shohësh Tiranën me gati një milion banorë, të shohësh edhe një mal, i cili i qëndron gjithmonë si kurorë qytetit të Tiranës dhe të shohësh që nuk ka asnjë skiator në ato qafa, nuk ka as një pistë, pra duhet të japim patjetër edhe sensin e realitetit, të realizmit të gjërave. Përtej Dajtit ka dhe vende të tjera të mrekullueshme. Pra dëshiroj t’u bëj apel, t’u bëj thirrje jo vetëm institucioneve, dëshiroj t’u bëj thirrje edhe kompanive private, t’i bëj thirrje edhe pushtetit vendor, i cili administron territorin, t’i bëj thirrje politikës, e cila duhet të jetë e vëmendshme jo vetëm thjesht për debatin politik të ditës. Jeta nuk është vetëm debat politik. Debati politik është në funksion të shumë elementëve të tjerë. Jeta fatmirësisht ka shumë dimensione: politik, institucional, administrativ, ekonomik, por ka dhe dimensionin sportiv. Dikush e sheh vetëm si argëtim, unë do të thoja që nuk është thjesht argëtim, por është edukim. Kjo është arsyeja që sot ndiehem i nderuar që pjesëmarrja në këtë aktivitet për një përfaqësim është kaq e gjerë me njerëz shumë të nderuar, me njerëz që i kam parë të angazhohen gjatë gjithë jetës për këtë element që është një element shumë substancial tek njeriu - të dijë të jetë i edukuar dhe të edukojë të tjerët. Kjo është arsyeja që unë ndjehem vërtetë i nderuar, ndiehem i emocionuar në këtë ceremoni dhe për një arsye tjetër: që i vjen radha sërisht dorëzimit të flamurit kombëtar Erionit duke i uruar atij dhe sportit shqiptar suksese në këtë kompeticion, por edhe në shumë kompeticione të tjera! Urime!”
Fjala e Presidentit të Republikës z. Bamir Topi (marrë nga faqja zyrtare e presidences)
 |
|
|
Në datat 12-25 Shkurt 2010, në Vankuver te Kandasë do të mbahen Lojërat e 21 Olimpike Dimërore. Shqipëria e cila merr pjesë për herë të dytë në histroinë e Lojërave Olimpike Dimërore do të përfaqësohet në “Vancouver 2010” me skiatorin Erjon Tola. Përfaqësimi i parë Shqipërsië në Lojërat Olimpike Dimërore ka qënë në “Torino 2006” ku sportisti Erjon Tola fitoi kualifikimin për pjesëmarrje.
KOKSH me marrjen e ftesës nga CIO për pjesemarrjen e Shqiperisë në Lojërat Olimpike Dimërore "Vancouver 2010" e cila iu dorëzua Sekretarit të Përgjithshëm të KOKSH, z. Stavri Bello, nisi punën përgatitore për pjesëmarrjen në këto lojëra. KOKSH gjithashtu i ka krijuar mundësinë nëpërmjet Solidaritetit Olimpik që sportisti të përfitojë Bursën Olimpike për Sportist për të siguruar përgatitjen optimale të tij.   Erjon Tola
Datelindja: 15 Dhjetor 1986
Sportisti i vetëm Shqipëtar pjesëmarrës në Lojërat Olimpike Dimërore “Vancouver 2010”, që do zhvillohen në Kanada në datat 12-28 Shkurt 2010.
Errjon Tola dhe këtë herë do të jetë mbajtësi i flamurit shqiptar në ceremoninë e celjes së Lojrave, ku Shqipëria do të jetë e dyta që do të parakalojë. Pjesëmarrës për herë të dytë në Lojërat Olimpike Dimërore pas atyre në ‘Torino 2006”.
Erjon Tola është kualifikuar për të marrë pjesë në tre gara :
1. Super G me datë 19 Shkurt 2010
2. Giant Slalom 21 Shkurt 2010
3. Slalom 27 Shkurt 2010
Ekipi Olimpik Shqipëtar përbëhet nga :
1. Shkëlqim Mema – Shef Misioni
2. Erjon Tola – Sportist;
3. Roberto Bonavita – Trajner;
|
|
|
2010-01-30 
Seminar i HapurSot, Komiteti Olimpik Kombetar Shqiptar organizoi ne ambjentet e AEFS "Vojo Kushi" seminarin me teme: “Performanca e lartë e stafeve dhe organizimi i ekipeve të punës në Organizatat Sportive” Pjesemarres ne kete seminar ishin sekretare te federatave sportive kombetare dhe te ftuar nga Komuna e Tuzit, Mali i Zi. Seminari u hap me pershendetjen e Sekretarit te Pergjithshem te KOKSH z. Stavri Bello dhe Rektori i AEFS z. Vejsel Rizvanolli. Drejtuesit e seminarit ishin: Dr. Thierry Zintz - Lektor për Menaxhimin e Organizatave Sportive në Universitetin të Louvain, Belgjikë i cili mbajti temen “Performanca e lartë e stafeve dhe organizimi i ekipeve të punës në Organizatat Sportive” [prezantimi PDF] dhe Master Alma Papic - Master Ekzekutiv per Menaxhimin e Organizatave Sportive Olimpike - nga Kroacia e cila prezantoi temen “Sistemi Sportiv ne Kroaci" [prezantimi PDF] Seminari ishte shume interesant dhe ofroi një panoramë rreth aspekteve të krijimit të një menaxhimi performues dhe administrimit të ekipeve të punës brenda Organizatave Sportive (Federatat, Klube), në mënyrë që të prodhohet një nivel i lartë shërbimesh tek të gjithë personat që kanë të bëjnë me sportin dhe në vecanti me sportistët elitarë. Ne zyrat e KOKSH gjithashtu u organizua nje takim i vecante midis Drejtoreve Kombetar te Administratoreve Sportive dhe lektoret e ardhur te cilet kane diskutuar lidhur me projektin qe do te nisi se shpejti ate te "Kursi i Avancuar mbi Menaxhimin e Organizatave Sportive Olimpike", kurs ky i cili eshte nen patronazhin e Komitetit Olimpik Nderkombetar (CIO).
|
|
|
2010-01-26 Tiranë, 26 Janar 2010
DEKLARATE PER SHTYP
KUNDER DHUNES NE SPORT
Komiteti Olimpik Kombëtar Shqiptar është njohur me ngjarjet e djeshme te ndodhura gjatë zhvillimit të ndeshjes se futbollit Tirana – Dinamo në stadiumin Qemal Stafa, ku janë shfaqur akte dhune në sport duke lënë një shije të hidhur për imazhin e sportit dhe vlerat e tij.
KOKSH i bindur në filozofinë edhe misionin e Lëvizjes Olimpike dhe Sportive që promovon paqen, respektin, lojën e ndershme të bazuar në rregulla, e ndjejmë obligim të dalim me këtë deklaratë për të dënuar dhunën në sport.
Ne, besojme plotësisht në parimet themelore te Olimpizmit dhe dënojmë me forcë cdo akt dhune apo diskriminimi në cfaredo lloj forme të shfaqjes së saj, se akte të tilla, nuk janë aspak etike madje në kundershtim me frymën e Fair Play
KOKSH dënon cdo akt dhune, diskriminimi apo fyerje e shfaqur kjo në të gjitha ambjentet sportive
Ne dënojme me forcë cdo shfaqje dhune apo veprim që është në kundërshtim me frymën e Olimpizmit dhe Fair Play vlerat e tolerancës dhe të miqësisë në sport
KOKSH është i bindur se akte të tilla do të dënohen gjithmonë nga autoritetet përkatëse për të mbrojtur vlerat dhe lavdinë e sportit dhe që këto të mos jetë një fenomen i zakonshëm i kulturës sportive në shoqërinë tonë.
Ne kërkojmë nga të gjithë aktorët sportivë dhe publikë, ata që ndikojnë në mënyrë direkte apo indirekte në sport, dhe në vecanti sportistëve, trajnerëve, zyrtarëve, tifozëve, etj. që të japin kontributin e tyre për shfaqjen e vlerave të vërteta të sportit.
Në kushtet kur Shqipëria po aspiron të renditet dhe ajo përkrah shteteve të tjera europiane si e barabartë me ta në BE është e nevojshme dhe ne të jemi në të njëjtën linjë të bashkëpunimit evropian në luftën kundër dhunës në sport duke nxitur aktivisht zhvillimin e parandalimit të dhunës dhe përmirësuar zhvillimin e sportit në nivel kombëtar dhe ndërkombëtar.
Parimet themelore të Olimpizmit
1. Olimpizmi është një filozofi e jetës, duke lartësuar dhe kombinuar në një tërësi të ekuilibruar cilësitë e trupit, vullnetit dhe mendjes. Duke ndërthurur sportin me kulturë dhe arsim, Olimpizmi kërkon të krijojë një stil jete të bazuar në kënaqësi e përpjekje, vlera edukative të shembullit të mirë dhe respektit për parimet themelore etike universale.
2. Qëllimi i Olimpizmit është të vendosi sportin në shërbim të zhvillimit harmonik të njeriut, me synimin për të promovuar një shoqëri paqësore dhe ruajtjen e dinjitetit njerëzor.
(Karta Olimpike)
|
|
|
